Një operacion i policisë në Vlorë ka çuar në arrestimin e një 17-vjeçari dhe procedimin në gjendje të lirë të një 16-vjeçari për shpërndarje të lëndëve narkotike. Të dy adoleshentët u kapën me doza kokaine dhe kanabisi të dyshuara për shitje.
Policia, në kuadër të parandalimit dhe goditjes së veprimtarisë kriminale në fushën e narkotikëve, kishte marrë informacione për dy adoleshentë që mund të ishin të involvuar në shpërndarjen e lëndëve narkotike. Si rezultat, shërbimet e Forcës së Posaçme “Shqiponja” ushtruan kontrolle në zona të ndryshme të qytetit, përfshirë akset kryesore.
Mbrëmjen e djeshme, në lagjen “Pavarësia”, policia ndaloi dhe kontrolloi dy të rinjtë, të dyshuar si shpërndarës. Gjatë kontrollit, në çantën e 17-vjeçarit D. M. u gjetën 10 doza të mbështjella me qese plastike, të dyshuara si kokainë, si dhe një sasi kanabisi e mbështjellë me letër alumini.
Pas përfundimit të veprimeve procedurale, 17-vjeçari u arrestua në flagrancë, ndërsa 16-vjeçari u procedua në gjendje të lirë. Materialet e rastit iu referuan Prokurorisë së Vlorës për veprën penale “Prodhimi dhe shitja e narkotikëve”.
