Florind Rama u arrestua në Pereira të Kolumbisë, pasi ishte shpallur në kërkim për një vrasje që nga viti 2022. Mediat kolumbiane kanë publikuar pamjet e arrestimit, ku agjentët i vendosin prangat dhe i komunikojnë akuzat, ndërsa ai kërkon të bëjë një telefonatë për të kontaktuar familjarët dhe deklaron se nuk ka nevojë për avokat.
Rama, i njohur edhe si “Florin Terziu”, ishte shpallur në kërkim nga Interpol në kuadër të një hetimi për rrëmbim, torturë dhe vrasje që ndodhi në Marbella. Gjatë arrestimit, ai tentoi të prezantohej si shtetas gjerman, por autoritetet kishin informacion të plotë për identitetin dhe të kaluarën e tij kriminale. Dyshohet se ai përdorte disa pasaporta dhe lëvizte në vende të ndryshme të Evropës.
Hetimet e lidhin atë me struktura kriminale që operojnë në zonën e Costa del Sol, e njohur për aktivitetin e trafikut të drogës dhe rrjete ndërkombëtare kriminale. Ngjarja për të cilën akuzohet lidhet me vrasjen e një shtetasi serb në qershor të vitit 2022 në Golden Beach në Marbella, ku viktima u gjet me shenja torture dhe plagë nga armë zjarri.
Autoritetet ndërkombëtare po vijojnë hetimet për të zbuluar lidhjet e mundshme të tij me grupe kriminale në disa vende të Evropës dhe më gjerë.
