Tre persona janë arrestuar në Shkodër për kanosjen e dy shtetasve, babë e bir, për motive të dobëta. Operacioni policor i koduar “Produkti”, i kryer nga Seksioni për Hetimin e Krimeve të Rënda dhe Seksioni për Hetimin e Krimeve Ekonomiko-Financiare, nën drejtimin e Prokurorisë, rezultoi në arrestimin e G. B. (67 vjeç), E. B. (33 vjeç) dhe A. B. (61 vjeç), të gjithë banues në Shkodër.
Arrestimet u realizuan pas dyshimeve se këta shtetas, në bashkëpunim me njëri-tjetrin, kanosën dy shtetas me qëllim përfitimin e pasurisë. Gjatë kontrollit të aktivitetit tregtar të G. B. dhe E. B., u konstatua se ata prodhonin produkte ushqimore pa miratimin e autoriteteve përkatëse dhe në kushte jo higjeno-sanitare.
Si rezultat, u bllokua aktiviteti i tyre dhe u sekuestruan etiketa dhe stampa për tetë produkte ushqimore, si dhe tre aparate celularë. Materialet procedurale janë dërguar në Prokurorinë pranë Gjykatës së Shkallës së Parë të Juridiksionit të Përgjithshëm Shkodër për akuzat e shtrëngimit me anë të kanosjes ose dhunës për dhënien e pasurisë, fshehjes së të ardhurave, pastrimit të produkteve të veprës penale, mashtrimit me produktet ushqimore dhe prodhimit të kundërligjshëm të artikujve dhe mallrave industrialë dhe ushqimorë.
