Astronautët e Artemis II janë rikthyer me sukses në Tokë pas një misioni 10-ditor në hapësirë, që u ndoq drejtpërdrejt nga NASA. Rikthimi filloi me hyrjen e kapsulës Orion në atmosferë me një shpejtësi rreth 39 mijë kilometra në orë, ku komunikimet me Tokën u ndërprenë për disa minuta për shkak të plazmës që rrethonte mjetin. Pasi u rivendos sinjali, kapsula vazhdoi zbritjen dhe parashutat u hapën siç ishte planifikuar, duke mundësuar një ulje të kontrolluar në Oqeanin Paqësor. NASA raportoi se ulja ishte e përkryer dhe shumë e saktë.
Menjëherë pas uljes, ekipet e shpëtimit iu afruan kapsulës për të verifikuar sigurinë dhe për ta stabilizuar atë. Astronautët dolën nga kapsula një nga një, me komandantin Reid Wiseman të fundit. Ata u transportuan me helikopter drejt anijes ushtarake USS John P. Murtha. Të katërt ishin në humor të mirë, duke buzëqeshur dhe përshëndetur, dhe ecën vetë drejt qendrës mjekësore për kontrollime të detajuara.
Ky mision ishte fluturimi i parë testues me ekuipazh në programin Artemis, pasardhësin e projektit Apollo, dhe misioni i parë në botë që dërgon astronautë në afërsi të Hënës, jashtë orbitës së Tokës, pas 53 vjetësh. Ai konsiderohet një hap i rëndësishëm drejt objektivave të ardhshëm të eksplorimit hapësinor, përfshirë rikthimin e njerëzve në Hënë dhe misionet e ardhshme drejt Marsit.
