Qindra besimtarë në Korçë kanë kremtuar të Premten e Zezë, e cila simbolizon vdekjen e Krishtit në kryq. Në mbrëmje të kësaj dite, është zhvilluar procesioni i varrimit të Krishtit. Besimtarët e besimeve të ndryshme i janë bashkuar ceremonive, duke ndjekur kortezhin në bulevardet kryesore të qytetit.
Aktivitetet kanë filluar me mbajtjen e meshës, ndërsa më pas qytetarët kanë parakaluar nga njëra kishë në tjetrën për të bashkuar epitafet e 7 kishave në qendër të qytetit, te sheshi para Katedrales “Ngjallja e Krishtit”. Nën sfondin e muzikës funebre, besimtarët kanë ndjekur ritualin e përvitshëm, duke kaluar nën epitaf dhe duke u lutur për paqe dhe dashuri.
