Fluksi i lëvizjeve në pikën kufitare të Kapshticës është i lartë në prag të festës së Pashkës, me qindra emigrantë që po kthehen në vend për të kaluar festat me familjarët. Sipas të dhënave zyrtare, gjatë 24 orëve të fundit, në territorin shqiptar përmes kësaj pike kufitare kanë hyrë 7,475 shtetas, ndërsa kanë dalë 2,741 shtetas, duke treguar një rritje të ndjeshme të hyrjeve në raport me daljet.
Lëvizjet janë përqendruar kryesisht në orët e paradites, ku është regjistruar një fluks automjetesh. Megjithatë, situata paraqitet e menaxhueshme. Autoritetet kufitare kanë shtuar sportelet në funksion dhe po punojnë me kapacitete të plota për të përballuar fluksin, me qëllim shmangien e pritjeve të gjata dhe lehtësimin e procedurave për qytetarët. Fluksi pritet të vazhdojë edhe në ditët në vijim, pasi afrimi i Pashkës Ortodokse zakonisht sjell një rritje të hyrje-daljeve në pikat kufitare, veçanërisht në juglindje të vendit.
