Një 26-vjeçar, R. K., është arrestuar në flagrancë nga policia në aksin rrugor Elbasan-Tiranë, pasi u kap duke transportuar me furgon veshje të dyshuara si kontrabandë, me vlerë rreth 45 mijë euro. Operacioni, i koduar “Wrong way”, çoi në sekuestrimin e mallrave dhe mjetit, ndërsa hetimet vijojnë për persona të tjerë të përfshirë.
Sipas njoftimit të policisë, R. K. u kap duke transportuar 19 paketime me veshje imitime të markave të ndryshme, pa dokumentacion shoqërues. Specialistët e Seksionit për Hetimin e Krimit Ekonomik dhe Financiar të DVP Tiranë organizuan dhe finalizuan operacionin bazuar në informacione të siguruara në rrugë operative.
Materialet procedurale iu referuan Prokurorisë së Tiranës për veprime të mëtejshme, ndërsa hetimet për dokumentimin e kësaj veprimtarie të kundërligjshme dhe identifikimin e shtetasve të tjerë që mund të jenë të përfshirë vazhdojnë.
