Një situatë shqetësuese është denoncuar në emisionin investigativ “Fiks Fare” nga Drita Bazhdari, një punonjëse e ujësjellësit në Mirditë, e cila pas 42 vitesh pune thotë se paguhet pa kryer asnjë detyrë. Ajo thekson se është lënë jashtë çdo procesi pune për rreth 8 muaj, duke qëndruar çdo ditë 8 orë para kompjuterit pa bërë asgjë.
Bazhdari, e angazhuar për dekada në sektori teknik, tregon se përgjegjësi i saj ka vendosur një punonjës të ri në vendin e saj dhe kjo ka krijuar një situatë denigruese për të. Megjithëse vazhdon të marrë pagën, ajo e konsideron këtë situatë të padrejtë. Ajo ka kërkuar ndihmë nga drejtuesit në Lezhë, por pa rezultate konkrete. Sipas saj, ka pasur vonesa në pagesa, ku për dy muaj nuk është paguar, ndërsa pagesat janë bërë më vonë të gjitha njëherësh.
Gjatë një takimi, drejtori në Lezhë i kishte premtuar se do të ndërhyjë për caktimin e një plani pune, por kur është rikthyer, Bazhdari nuk e ka gjetur përgjegjësin në zyrë. Ky i fundit në një bisedë telefonike ka thënë se “ajo i di detyrat” dhe se “në punë është, pasi pagën e ka marrë”.
Drita Bazhdari thekson se kërkon vetëm të rikthehet në normalitet dhe të ushtrojë profesionin e saj, duke shprehur dëshirën për të kontribuar. “Unë dua të punoj. Nuk dua të rri kot për 8 orë,” thekson ajo.
Përballë interesimit të gazetarit të “Fiks Fare”, përgjegjësi Nikolin Kaçorri ka dhënë deklarata kontradiktore, në disa raste duke pretenduar se punonjësja ka refuzuar punën, ndërsa në disa të tjera se ajo ka kryer detyrat. Kjo situatë ngre pyetje mbi praktikantën e menaxhimit të punonjësve në këtë institucion dhe nevojën për sqarim dhe zgjidhje të menaxhuara në mënyrë të duhur.
