Emmanuel Macron, shefi i Elizesë, ishte ndër liderët e parë që reaguan ndaj marrëveshjes së armëpushimit mes SHBA-së dhe Iranit. Ai e përshkroi këtë zhvillim si një hap pozitiv, por theksoi se marrëveshja duhet të përfshijë edhe Libanin. Sipas tij, armëpushimi dyjavor duhet të ndalojë sulmet izraelite ndaj Libanit, vendin ku situata është e jashtëzakonshme. “Nuk është e drejtë mënyra se si janë zhvilluar sulmet izraelite dhe pushtimi i jugut të Libanit,” u shpreh Macron.
Këtë qëndrim e mbështeti edhe qeveria e Madridit. Ministri i Jashtëm spanjoll, Jose Manuel Albares, e konsideroi të papranueshëm vazhdimin e pushtimit të Libanit nga forcat izraelite pas marrëveshjes për armëpushim. Ai apeloi për mbylljen e të gjitha frontet e konfliktit, duke përfshirë atë të Libanit. Kryeministri spanjoll, Pedro Sanchez, e mirëpriti armëpushimin por paralajmëroi se nuk do të duartrokasin ata që kanë provokuar tensionet, pavarësisht se tani po ndihmojnë për zgjidhjen e situatës.
Shefja e Komisionit Europian, Ursula von der Leyen, gjithashtu e mirëpriti marrëveshjen, duke theksuar rëndësinë e vijimit të negociatave për një zgjidhje afatgjatë të konfliktit. Ajo theksoi se tani është thelbësore që nisma të shoqërohet me veprime konkrete.
Sipas mediave iraniane, Mohammad Bagher Ghalibaf është caktuar si kryenegociator i Iranit për bisedimet që do të zhvillohen të premten në Islamabad, ndërsa në krye të delegacionit të SHBA-së pritet të jetë zv/presidenti JD Vance. Ky zhvillim nënvizon dinamizmin e situatës dhe nevojën për një qasje të koordinuar nga të gjitha palët e angazhuara për zgjidhjen e tensioneve në rajon.
