Katër astronautët e misionit Artemis II të NASA, Reid Wiseman, Victor Glover, Christina Koch dhe Jeremy Hansen, kanë arritur një distancë rekord prej 252,760 miljesh nga Toka, duke tejkaluar rekordin 56-vjeçar të vendosur nga Apollo 13. Ata po udhëtojnë me kapsulën Orion që u nis nga Florida javën e kaluar.
Gjatë kësaj faze, ekuipazhi do të kalojë mbi anën e errët të Hënës, duke e vëzhguar atë nga rreth 4 mijë milje lartësi. Ky moment përbën kulmin e misionit 10-ditor, që është fluturimi i parë testues me ekuipazh për programin Artemis, i cili ka si qëllim rikthimin e astronautëve në Hënë deri në vitin 2028 dhe ndërtimin e një baze amerikane atje, si hap për misionet e ardhshme në Mars.
Fluturimi rreth Hënës do të zgjasë rreth gjashtë orë dhe mund të ketë ndërprerje të përkohshme komunikimi për shkak të bllokimit të lidhjes me rrjetin e NASA-s nga Hëna. Astronautët do të realizojnë fotografi të detajuara të Hënës përmes dritareve të Orionit, duke kapur pamje shkencore të rëndësishme, përfshirë momentin kur Toka shfaqet dhe zhduket mbi horizontin hënor.
Në Qendrën Hapësinore “Johnson” në Houston, dhjetëra shkencëtarë po monitorojnë misionin në kohë reale, analizojnë dhe përpunojnë të dhënat e dërguara nga ekuipazhi në hapësirë. Ky mision përfaqëson një hap të rëndësishëm në eksplorimin hapësinor, duke vendosur bazat për të ardhmen e udhëtimeve në Hënë dhe përtej saj.
