Një tjetër tender me vlerë të konsiderueshme në sektorin e energjisë elektrike ka përfunduar në duart e një kompanie që lidhet me emra të njohur të biznesit në vend. Bëhet fjalë për kompaninë “4 A-M” shpk, e cila është shpallur fituese për Lotin 2 të një projekti të rëndësishëm në juglindje të vendit.
Sipas të dhënave zyrtare, tenderi është zhvilluar nga Drejtoria Rajonale e OSSH Korçë dhe ka si objekt “Zhvillimin e rrjetit TM 20 kV, ndërtimin e kabinave elektrike, rrjetin TU me përcjellës ABC për Fiderin 8 në nënstacionin e Pogradecit, si dhe ndërtimin e tubacioneve dhe pusetave për daljet e fiderave 2, 3, 4 dhe 8”.
Fondi limit i këtij projekti ka qenë 130,361,040 lekë pa TVSH, ndërsa oferta fituese e kompanisë “4 A-M” shpk rezulton në vlerën 127,779,422 lekë pa TVSH.
Në garë kanë marrë pjesë vetëm dy operatorë ekonomikë: “4 A-M” shpk dhe “REJ” shpk, duke ngritur pikëpyetje mbi nivelin e konkurrencës reale në këtë procedurë.
Burime dhe indicie të ndryshme sugjerojnë se pas kompanisë fituese qëndron Ardit Metaliaj, i konsideruar si një nga njerëzit e afërt dhe të besuar të biznesmenit të njohur Bashkim Ulaj. Ky i fundit prej kohësh përflitet për ndikimin e tij në sektorin e ndërtimit dhe projektet publike strategjike.
Ky zhvillim vjen në një kohë kur Ministria e Energjisë dhe Infrastrukturës, e drejtuar nga Enea Karakaci i Ballukut, është shpesh në qendër të kritikave për mënyrën e shpërndarjes së fondeve publike dhe transparencën e procedurave tenderuese.
Fakti që një tender me vlerë mbi 130 milionë lekë zhvillohet me vetëm dy operatorë në garë dhe përfundon tek një kompani e lidhur me emra të fuqishëm të biznesit, ngre dyshime serioze për paracaktim të fituesit dhe mungesë gare reale.
Ndërkohë, mbetet për t’u parë nëse institucionet e drejtësisë, përfshirë SPAK, do të nisin verifikime mbi këtë procedurë dhe lidhjet e mundshme që mund të kenë ndikuar në rezultatin final.
