Deputeti i Partisë Demokratike, Enno Bozdo, shprehu shqetësimet e tij lidhur me projektligjin për Parkun Teknologjik “Durana”, duke e cilësuar atë si një rrezik për transparencën dhe përputhshmërinë me standardet e Bashkimit Evropian (BE). Ai njoftoi se ka kërkuar informacion nga Ministria e Ekonomisë për kompani të regjistruara virtualisht në këtë park, duke theksuar se pas 15 ditësh, siç kërkohet me ligj, nuk mori asnjë përgjigje. Pas afro tre muajsh, ai e përsëriti kërkesën e tij.
Bozdo argumentoi se dhënia e lehtësive fiskale për kompanitë që operojnë vetëm virtualisht bie ndesh me standardet ndërkombëtare të OECD dhe legjislativin e BE, i cili synon të parandalojë shmangien e taksave. Ai nënvizoi se projektligji i ri i propozuar nga maxhoranca, që amendon ligjin ekzistues për parqet teknologjike, po kalon pa transparencë dhe pa konsultime me publikun.
Në amendamentet e propozuara, Bozdo theksoi se koncepti i “virtualitetit” po bëhet legjitim, e që lehtësitë fiskale të ofruara deri tani janë të paligjshme sipas ligjit. Ai theksoi se ndihmat shtetërore për kompani që regjistrohen virtualisht minojnë konkurrencën dhe ofrojnë përjashtime tatimore të padrejta.
Kritika të tjera u përqendruan në mundësitë për marrëveshje të brendshme mes përdoruesve të parkut dhe institucioneve publike, që mund të dëmtojnë interesat publike. Bozdo kërkoi që të gjitha marrëveshjet të jenë transparente dhe të kalojnë nëpër procedura konkurruese.
Një pjesë e rëndësishme e projektligjit parashikon ngritjen e “Data Center”-eve, aktivitet që, sipas tij, duhet të rregullohet me legjislacion të veçantë përpara se të përfshihet në Park. Bozdo nënvizoi rëndësinë e rregulloreve të BE-së në këtë fushë, duke përmendur direktivat për energjinë dhe sigurinë kibernetike.
Ai përfundoi me kritika për mënyrën se si qeveria po e kalon legjislacionin, duke theksuar se të tilla veprime vetëm sa e thellojnë krizën e integrimit të Shqipërisë në BE. Sipas tij, roli i Parlamentit është reduktuar dhe se qeveria po dështonte të paraqiste një perspektivë të qartë dhe të besueshme për anëtarësimin në BE.
