Presidenti Bajram Begaj mori pjesë në Konferencën e XXII Kombëtare të Gastro-Entero-Hepatologjisë, ku theksoi rëndësinë e profesionit të mjekut në shoqëri. Ai nënvizoi se mjekësia nuk është thjesht një zanat, por një mënyrë e të menduarit që e shoqëron individin kudo. Sipas tij, mjekësia mëson të dëgjosh me kujdes dhe të hulumtosh shkakun përtej simptomave, duke kujtuar se pas çdo diagnoze qëndron një histori njerëzore.
Presidenti u adresua mjekëve duke theksuar se sistemi shëndetësor nuk qëndron mbi ndërtesa, por mbi profesionalizmin, integritetin dhe sakrificën e tyre. Ai e përmendi gjithashtu sfidat aktuale me të cilat përballet profesionin, përfshirë ndikimin e inteligjencës artificiale. Begaj shpjegoi se, ndonëse teknologjia ofron ndihmë dhe inteligjenca artificiale mund të analizojë mijëra imazhe në pak sekonda, vendimet përfundimtare që lidhen me shëndetin e pacientëve i takojnë mjekëve. Ai theksoi se mjekësia është më shumë se një shkencë: ajo përfshin gjykim, përgjegjësi, etikë dhe marrëdhënie njerëzore.
Në përfundim, Presidenti Begaj u ndal te rëndësia e marrëdhënies mes mjekut dhe pacientit, duke e cilësuar rolin human të mjekut si të pazëvendësueshëm përballë transformimeve teknologjike që po ndodhin në fushën e shëndetësisë.
