Një rast i rëndë ka tronditur Shkodrën, ku një 13-vjeçar akuzohet për dhunë ndaj bashkëmoshatarëve dhe të moshuarve. Denoncimi është bërë nga një nënë në emisionin investigativ “Fiks Fare”, e cila zbulon se djali i saj, nxënës në klasën e tetë, është objekt i terrorit nga i mituri.
Ky i fundit, i cili pavarësisht se është larguar nga shkolla, vazhdon të ushtrojë dhunë dhe kërcënime në ambientet e saj, duke krijuar situata frike për fëmijët dhe prindërit. Nënë thotë se djali i saj është bërë i frikësuar dhe detyrohet të shoqërohet nga baba për të shkuar në shkollë. Sipas saj, i mituri e ka detyruar djalin të dorëzojë biçikletën e tij dhe në disa raste e ka dhunuar fizikisht.
Pamjet e siguruara nga “Fiks Fare” përforcojnë këtë alarm, duke treguar i miturin që dhunon një të moshuar, duke i grabitur sendet personale. Në anën tjetër, nëna e 13-vjeçarit ofron justifikime për sjelljen e djalit, duke e atribuuar atë në hiperaktivitet dhe pranon se ai është referuar në komisariat, por nuk ndan më shumë detaje për situatën e tij.
Drejtuesit e shkollës pranojnë se i mituri ka pasur probleme me mungesat, por theksojnë se brenda shkollës ka sjellje të rregullt. Nga ana e policisë, informohet se ai është referuar katër herë në prokurori për vjedhje, por e drejta penale për individët nën 14 vjeç nuk lejon ndërhyrje ligjore. Prokuroria ka konfirmuar se çështja po hetohet, por pa detaje të mëtejshme.
Ky rast ngre shqetësime për sigurinë në komunitet dhe nevojën për ndërhyrje më të thellë në sistemin arsimor dhe social për trajtimin e sjelljeve problematike të të rinjve.
