Bordi i Transparencës ka vendosur uljen e çmimit të naftës në Shqipëri me 11 lekë, duke e vendosur çmimin tavan në 203 lekë për litër në të gjitha pikat e shitjes me pakicë. Ndërsa çmimi i benzinës nuk do të kalojë 175 lekë për litër. Ky vendim hyri në fuqi pasditen e së enjtes, në orën 18.30, dhe obligon të gjitha bizneset e tregtimit të hidrokarbureve ta zbatojnë deri në mbledhjen e radhës të Bordit të Transparencës.
Përpara këtij vendimi, nafta tregtohej në Tiranë dhe qytete të tjera me çmime që varionin nga 214 lekë deri në 217 lekë për litër. Rritja e çmimeve të hidrokarbureve në Shqipëri kishte si shkak kryesor tensionet në Lindjen e Mesme, veçanërisht mbylljen e ngushticës së Hormuzit nga iranianët, e cila përkeqësuan situatën në tregjet globale të naftës.
Gjithashtu, përplasje të tilla si ajo ndërmjet SHBA-së dhe Izraelit me Iranin kanë sjellë rritje të çmimit të naftës së papërpunuar, e njohur si Brent, që ka pasur ndikim në të gjithë botën, duke përfshirë edhe Shqipërinë. Tensionet gjeopolitike vazhdojnë të kenë pasoja të ndjeshme në çmimin e energjisë, duke ndikuar negativisht në ekonominë e vendeve që varen nga importet e karburanteve.
Kjo ulje e çmimit është një përgjigje e drejtpërdrejtë ndaj situatës së këtyre ditëve në tregun global dhe synon të lehtësojë barrën ekonomike për konsumatorët shqiptarë. Bordi i Transparencës kërkon që të sigurojë transparencë në tregtinë e hidrokarbureve dhe të mbajë nën kontroll çmimet në një situatë të pasigurt. Shpresohet se ky vendim do të ndihmojë në stabilizimin e çmimeve, të paktën deri në mbledhjen tjetër të Bordit, ku do të rishikohet situata.
