Katër shtetas të Republikës së Shqipërisë janë arrestuar në Serbi të martën, sipas një komunikate nga ministria e brendshme serbe. Arrestimi ka ardhur pas shfaqjes së simboleve kombëtare shqiptare nga shqiptarët gjatë qëndrimit të tyre në territorin serb.
Autoritetet serbe kanë ngritur akuza ndaj tyre për “nxitje të urrejtjes dhe intolerancës kombëtare, racore dhe fetare”, një vepër penale e definuar në legjislacionin e vendit. Sipas komunikatës, një nga të arrestuarit kishte publikuar një video në rrjetet sociale ku shfaqet duke udhëtuar me një automjet “Audi”, së bashku me tre persona të tjerë. Në pamjet e shpërndara në Facebook, ata ishin të veshur me bluza që paraqisnin simbole kombëtare shqiptare dhe referenca për “Shqipërinë Etnike”.
Mediat serbe raportojnë se arrestimi është realizuar menjëherë pas identifikimit të tyre dhe ndalimit të automjetit nga patrullat policore. Pjesëtarët e Grupit të Ndaluar janë urdhëruar t’i nënshtrohen një ndalimi policor për 48 orë, ndërsa çështja pritet t’i kalojë prokurorisë në Beograd për procedura të mëtejshme.
