Në Kosovë, namazi i Fitër Bajramit u mbajt në orën 06:18, nën drejtimin e kryeimamit të Bashkësisë Islame, Vedat Sahiti, ku myftiu i Kosovës, Naim Tërnava, mbajti hytben tradicionale. Ai u adresua besimtarëve me mesazhe paqeje, solidariteti dhe bashkimi, duke e cilësuar këtë ditë si një festë të gëzimit dhe falënderimit për ata që kaluan Ramazanin me përkushtim.
Tërnava theksoi rëndësinë e vlerave familjare, ndihmës ndaj nevojtarëve dhe forcimit të unitetit shoqëror. Ai apeloi për respekt ndaj pluralizmit dhe pranimin e dallimeve ndërmjet individëve dhe komuniteteve, pa dominim ekonomik, kulturor apo ushtarak. Sipas tij, diversiteti është një element thelbësor i natyrës njerëzore që meriton të kuptohet dhe respektohet.
Duke folur për sfidat e shoqërisë, Tërnava vuri në dukje tensionet dhe përçarjet aktuale, si dhe vështirësitë në zgjidhjen e problemeve politike dhe sociale. Ai theksoi se dialogu është më i fortë se përçarja dhe se urtësia zë vendin e zemërimit. Ai besonte se nëse këto vlera kultivohen, shumë probleme do të zgjidheshin.
Tërnava adresoi gjithashtu politikën, duke e cilësuar si të pa pranueshme ngecjen e vendit në kushte paqeje për shkak të mungesës së vullnetit për dialog dhe përgjegjësi. Ai kërkoi maturi të lartë shtetërore dhe një kulturë dialogu që privilegjon interesin e vendit mbi çdo interes tjetër. Ai e theksoi se historia do të gjykojë për vendimet e marra dhe për ato momente kur përgjegjësia është shpërfillur.
Në përfundim, Kryesia e Bashkësisë Islame të Kosovës organizoi një pritje tradicionale për urime në selinë e saj, ku morën pjesë drejtuesit shtetërorë dhe ata fetarë, duke u uruar njëri-tjetrit për Ditën e Fitër Bajramit.
