Top Channel ka siguruar dokumente që tregojnë se kompania “Rejsi Farma” po përpiqet të marrë dy herë pagatime për fatura, të cilat spitalet i kanë likuiduar në përfundim të çdo muaji bazuar në konsumet e medikamenteve. Ndërkohë, “Rejsi Farma” ka lëshuar fatura të tjera pa marrë parasysh pagesat e bëra më parë.
Në një rast të tillë, kompania tentoi të ekzekutojë këto fatura përmes një vendimi të Gjykatës së Fierit, duke bllokuar edhe llogarinë bankare të Spitalit Rajonal të Fierit. Problemi përfshin periudhën mars-korrik 2025, gjatë së cilës “Rejsi Farma” lëshoi një faturë prej rreth 120 milion lekë të vjetra në mënyrë abuzive.
Fondi i Detyrueshëm i Kujdesit Shëndetësor, që mbulon rimbursimin e barnave, dhe Spitali Rajonal i Fierit e kundërshtuan këtë veprim dhe paditën “Rejsi Farmën” në gjykatë. Ata kërkuan pezullimin e vendimit të Gjykatës së Fierit dhe pavlefshmërinë e titujve ekzekutivë për faturat e lëshuara nga kompania për periudhën e përmendur.
Të dy institucionet paraqitën faturat mujore të paguara ndaj “Rejsi Farmës” si prova në gjykatë. Pas shqyrtimit të të gjithë dokumenteve çështja u zhvillua në një seancë gjyqësore në Tiranë në fillim të shkurtit. Gjyqtari Aurel Arapi vendosi të pezullojë vendimin e Gjykatës së Fierit për ekzekutimin e faturave nga “Rejsi Farma”.
Ky rast hedh dritë mbi një praktikë abuzive të kompanisë, e cila po përpiqet të përfitojë dyfish nga buxheti shtetëror i planifikuar për rimbursimin e barnave në spitale. Kjo situatë ngre pyetje mbi transparencën dhe menaxhimin e fondeve në sistemin shëndetësor.
