Një 21-vjeçar shqiptar është dënuar me 3 vite e 8 muaj burg në Itali, për shkak të akuzave për grabitje dhe dhunë ndaj një 14-vjeçari. Vendimi u mor në procedurë të përshpejtuar nga gjykata, pas hetimeve që zbuluan se ai dhe disa bashkëpunëtorë kishin terrorizuar të miturin për një periudhë disa mujore me qëllim shfrytëzimin financiar.
Ngjarjet kanë ndodhur në qytetin Borgo San Lorenzo, mes shtatorit 2024 dhe prillit 2025. I pandehuri ka qenë në arrest shtëpie deri në shpalljen e vendimit. Hetimet zbuluan se i riu dhe bashkëmoshatarët e tij e ndalonin çdo javë 14-vjeçarin, duke e kërcënuar me dhunë për t’i marrë paratë që kishte me vete. Shumat që ata kanë arritur t’i marrin nga i mituri ishin të vogla, duke variuar nga disa monedha deri në 15 euro, por në total, dyshohet se grupi kishte marrë rreth 200 euro gjatë muajve.
Dëshmitarët raportojnë se autorët e kërcënonin fëmijën me fraza si: “Nëse nuk më jep para, do të të rrah,” ose “Do të vij të të gjej në shtëpi.” I frikësuar nga kërcënimet, 14-vjeçari nuk kishte ndarë asnjë informacion me prindërit e tij, derisa vendosi të fliste vetëm pas një incidenti më 26 prill 2025, kur i pandehuri i kishte marrë me forcë portofolin.
Pas këtij ngjarjeje, babai i të miturit ndërhyri për ta mbrojtur djalin, por ai u sulmua nga grupi me shkopinj. Hetuesit arritën të identifikonin dyshuarit përmes dëshmive të viktimës dhe fotografive. Përveç 21-vjeçarit, në hetim janë edhe tre nxënës të tjerë, të cilët në kohën e ngjarjeve ishin të moshës 16 dhe 17 vjeç. Ky rast nxjerr në pah shqetësimet për sigurinë e të miturve dhe dhunën e ushtruar ndaj tyre në shoqëri.
