Kosova është lavdëruar nga Bashkimi Europian për miratimin e Ligjit për të huajt, duke marrë si shpërblim heqjen e plotë të masave shtrënguese ndaj saj. Ndërsa për Serbinë, BE-ja shpreh pakënaqësi për avancimin e ngadalshëm të reformave, veçanërisht në fushat e sundimit të ligjit dhe demokracisë. Raportuesi për Serbinë në Parlamentin Europian, Tonino Picula, theksoi se situata në vend është polarizuar dhe e tensionuar, me një proces të ngadalësuar të anëtarësimit në BE që ka zgjatur për vite.
Picula e lidh stagnimin me përparimin e kufizuar në dialogun me Kosovën, mungesën e përputhshmërisë me politikën e jashtme dhe sigurisë të BE-së, si dhe përkeqësimin e kushteve për mediat dhe shoqërinë civile. Ai theksoi se angazhimet e deklaruara nuk kanë sjellë rezultate të dukshme në transformimin e vendit, duke e larguar atë gjithmonë e më shumë nga anëtarësimi. Një shembull i këtij mospërputhjeje është bojkotimi i samitit BE-Ballkani Perëndimor në dhjetor të kaluar dhe pjesëmarrja në paradën ushtarake në Moskë.
Përveç kësaj, gjendja e mediave në Serbi është përshkruar si “tronditëse”, ku sulmet dhe kërcënimet ndaj gazetarëve rikthejnë vendin në “kohë të errëta”. Kritika po ashtu vjen nga disa deputetë të Parlamentit Europian që vizituan Serbinë, të cilët shprehën shqetësim mbi mungesën e gatishmërisë për takime dhe retorikën armiqësore të autoriteteve, përfshirë presidentin Aleksandar Vuçic dhe kryetares së Kuvendit, Ana Bërnabiç.
Përfaqësues të Komisionit Europian kanë theksuar se ritmi i negociatave për anëtarësimin e Serbisë do të varet në masë të madhe nga përparimi në sundimin e ligjit dhe marrëdhëniet me Kosovën. Ashtu si në rastin e Kosovës, për Serbinë, reformat dhe përmbushja e pritshmërive të BE-së janë çelësi për ecurinë e ardhshme në procesin e anëtarësimit.
