Tiranë – Ka përfunduar operacioni policor i koduar “Flash”, i cili u realizua pas një administrimi të shpejtë të informacioneve për një rast të shitjes së narkotikëve. Në kuadër të këtij operacioni, është arrestuar në flagrancë 37-vjeçari S. A., që dyshohet se shiste lëndë narkotike, konkretisht Kokainë dhe Heroinë.
Duke u mbështetur në informacionet e marra në rrugë operative, Seksioni për Hetimin e Narkotikëve, në bashkëpunim me Forcën e Posaçme “Shqiponja”, kreu operacionin në Rrugën e Dibrës. Gjatë kontrolleve, policia sekuestroi sasi të lëndëve narkotike të ndara në doza, gati për shitje, të cilat iu gjetën S. A. gjatë kontrollit fizik.
Ky person dyshohet se ishte i angazhuar në sigurimin dhe ndarjen e lëndëve narkotike për t’i shitur në zona të ndryshme, me fokus kryesor Rrugën e Dibrës. Hetimet për këtë veprimtari kriminale vijojnë, ndërsa materialet procedurale janë dërguar në Prokurorinë e Gjykatës së Shkallës së Parë të Juridiksionit të Përgjithshëm në Tiranë për veprime të mëtejshme.
