Frika nga racionimi i naftës është rritur në Britaninë e Madhe, me Ministrin e Thesarit, Dan Tomlinson, që e pranon mundësinë e këtij skenari për shkak të tensioneve në Lindjen e Mesme. Ai theksoi se ekzekutivi po monitoron situatën me kujdes, pasi furnizimet globale janë nën presion të madh. Rreth një e pesta e naftës botërore kalon përmes ngushticës së Hormuzit, e cila është bllokuar në një masë të madhe nga Irani pas sulmeve të SHBA-së dhe Izraelit. Tomlinson u shpreh se është e vështirë të parashikohet saktësisht impakti i krizës në muajt e ardhshëm.
Përveç frikës nga racionimi, çmimi i naftës ka njohur një rritje të mprehtë gjatë dy javëve të fundit. Në përgjigje, Qeveria britanike ka njoftuar një mbështetje prej 50 milion paund për ata që varen nga nafta për ngrohje. Eksperti i energjisë Nick Butler paralajmëroi se një mbyllje e plotë e ngushticës së Hormuzit do të sillte një mungesë globale të naftës brenda disa javësh, me pasojat më të rënda për vende si Sri Lanka, që janë veçanërisht të varur nga kjo rrugë detare.
Në këtë situatë, Sri Lanka ka filluar të përdorë një sistem modern racionimi të karburantit me kode që ka zëvendësuar shpërndarjen tradicionale, për të shmangur grumbullimin e karburanteve nga individë të caktuar. Ky hap vihet në praktikë edhe pse vendi ka naftë të mjaftueshme për të paktën katër muaj, duke synuar të menaxhojë më mirë burimet. Po ashtu, qeveria ushtarake e Mianmarit ka zbatuar racionim të karburantit për automjetet private për shkak të problemeve në zinxhirin e furnizim, gjithashtu të lidhura me konflikte ndërkombëtare.
Sistemi i targave “çift-tek” që kufizon lëvizjen e automjeteve ka sjellë radhë të gjata në pikat e karburantit dhe ngritje të çmimeve në qytete si Yangon, duke shqetësuar qytetarët dhe duke krijuar një atmosferë tensioni për shkak të situatave të pasigurisë energjetike.
