Një studim amerikan ka arritur në përfundimin se prania e personave shkaktarë të stresit në jetën tonë mund të lidhet me një plakje më të shpejtë biologjike. Kjo është veçanërisht e dukshme në marrëdhëniet e ngushta, si ato familjare, ku afërsia e detyruar intensifikon efektin e stresit.
Sipas shkencëtarëve, individë si kolegët që vazhdimisht ndajnë dramat e tyre, baballarët që kritikojnë stilin e jetesës, ose ata që monopolizojnë bisedat, nuk janë thjesht irritues, por mund të kenë ndikim negativ mbi ritmin e plakjes tonë. Rritja e numrit të njerëzve “bezdisës” rreth individit lidhet me një rrezik më të lartë të plakjes biologjike, dhe sa më shumë që duhet të ndërveprosh me ta, aq më shumë përshpejtohet procesi i plakjes.
Studimi zbuloi se për çdo individ problematik, ndarja e marrëdhënieve sjell rreth 1.5% plakje shtesë biologjike brenda një viti. Efektet e stresit nga këta individë janë të ngjashme me ato të stresit financiar ose atij në vendin e punës, duke rritur inflamacionin, ulur funksionin imunitar dhe rritur rrezikun për sëmundje të ndryshme.
Studimi përfshiu 2.345 pjesëmarrës nga Indiana, me një moshë që varionte nga 18 deri në 103 vjeç, të cilëve iu analizua ADN-ja për shënjues të plakjes dhe iu bënë pyetje të detajuara për marrëdhëniet shoqërore. Rezultatet treguan se individët me marrëdhënie të ndërlikuara ose ata që kishin kaluar një fëmijëri të vështirë ishin më të predispozuar të jetonin pranë njerëzve stresues. Gjithashtu, femrat raportuan një prani më të lartë të këtyre individëve në rrethin e tyre shoqëror në krahasim me meshkujt.
Ky studim thekson ndikimin e rëndësishëm që njerëzit rreth nesh kanë në shëndetin tonë biologjik dhe implikimet që sjellin marrëdhëniet e vështira në procesin e plakjes.
