Një ngjarje e rëndë është regjistruar në Vlorë, ku një 43-vjeçar është arrestuar në flagrancë për dhunë fizike ndaj një punonjësi të Policisë Bashkiake. Shtetasi M. L., banues në Vlorë, u ndalua për veprën penale “Goditja për shkak të detyrës”.
Incidenti ndodhi sot rreth orës 10:55, në rrugën “Mitaq Salati”, në lagjen “15 Tetori”. Arrestimi u realizua nga specialistët e Seksionit për Hetimin e Krimeve në Komisariatin e Policisë Vlorë. Sipas raportimeve, M. L. ka ushtruar dhunë ndaj punonjësit të Policisë Bashkiake, shtetasit S. N., i cili kishte vendosur një masë administrative për parkimin e gabuar të automjetit të tij.
Materialet e ngjarjes janë referuar Prokurorisë Vlorë, e cila do të marrë në shqyrtim rastin përkatës për të vazhduar procedurat ligjore. Arrestimi i M. L. vjen në një kohë kur autoritet kanë intensifikuar masat për të siguruar rendin dhe disiplinën në qytet.
