Vetëm disa orë pas deklaratës së kryeministrit grek, Kyriakos Mitsotakis, mbi mundësinë e studimit të energjisë bërthamore, debati ka marrë shtysë në politikë dhe në qarqet shkencore. Në samitin e Energjisë Bërthamore në Paris, Mitsotakis tha se Greqia po shqyrton reaktorët e vegjël modularë si një mundësi për sistemin energjetik të saj, pa u angazhuar për ndërtimin e centraleve bërthamore.
Mitsotakis theksoi: “Greqia po hap një faqe të re. Ka ardhur koha që vendi im të shqyrtojë nëse energjia bërthamore, dhe veçanërisht reaktorët e vegjël, mund të luajnë një rol në sistemin energjetik grek.” Specialistët grekë të energjisë kanë mirëpritur këtë hap, duke theksuar se teknologjia moderne e bërthamores është më e sigurt dhe se ajo mund të shërbejë si burim energjie bazë, duke plotësuar burimet e rinovueshme.
Megjithatë, disa ekspertë paralajmërojnë se një vendim i tillë do të kërkonte vite studimi dhe investime të mëdha, si dhe konsensus politik dhe shoqëror. Në anën tjetër, reagimet politike janë të ashpra. Socialistët e PASOK-ut akuzojnë qeverinë për mungesë strategjie dhe paralajmërojnë se energjia bërthamore do të rrisë varësinë e Greqisë nga jashtë, duke theksuar se kostot e saj janë më të larta se ato të energjisë së rinovueshme. Ata rekomandojnë investimin në alternativa si magazinimi i energjisë dhe gjeotermia.
Opozita, përfshirë SYRIZA-n, kundërshton kategorikisht idenë e energjisë bërthamore, duke e quajtur atë një kërcënim për sigurinë publike dhe mjedisin, veçanërisht për një vend sizmik si Greqia. Lideri i SYRIZA-s thekson se energjia bërthamore nuk është më e lirë dhe se sjell rreziqe serioze. Ky debat, që në të kaluarën ka qenë tabu, tani po hap shumë pyetje mbi të ardhmen energjetike të Greqisë.
