Kryeministri Edi Rama zhvilloi sot një mbledhje me Kryesinë e Partisë Socialiste (PS), e cila zgjati rreth dy orë. Pas përfundimit të saj, Sekretari i Përgjithshëm i PS, Blendi Klosi, theksoi se qëllimi kryesor i takimit ishte përgatitja për zgjedhjet në strukturat bazë të partisë. Në nëntor pritet që të realizohen zgjedhjet për strukturat qendrore.
Klosi njoftoi gjithashtu se më 21 mars do të zhvillohet një mbledhje tjetër, ku do të trajtohen kontributet e anëtarëve të partisë dhe mundësitë për anëtarësime të reja. Ai theksoi rëndësinë e vlersimit të individëve që kanë kontribuar për PS, duke u shprehur se synimi është të krijohet një strukturë e re që do të përfshijë edhe diasporën, sidomos në vendet ku partia ka marrë mbështetje të madhe gjatë zgjedhjeve të 11 majit.
“Gjatë mbledhjes së 21 marsit do të diskutojmë dhe do t’i hapim rrugë zgjedhjeve të reja brenda partisë, duke e bërë një rivlerësim të të gjithë kontributorëve”, tha Klosi. Sipas tij, ky proces do të sjellë dhe një dimension të ri në përpjekjet e partisë, duke përfshirë po ashtu shtrirjen e struktura në degët e PS në diasporë, me shpresën për të rritur pjesëmarrjen dhe mbështetjen nga shqiptarët jashtë vendit.
Klosi u shpreh se zgjidhja e këtyre çështjeve do të ndihmojë në forcimin e partisë dhe do të kontribuojë në një angazhim më të madh të anëtarëve të saj, duke rritur kështu ndikimin e PS, si brenda vendit ashtu edhe në komunitetet shqiptare jashtë Shqipërisë. Kjo mbledhje dhe ato të ardhshme duket se janë pjesë e një strategjie më të gjerë për të konsoliduar pozitat e PS dhe për të përgatitur terrenin për zgjedhjet e ardhshme.
