Pas një periudhe trevjeçare të pezullimit, bujqësia shqiptare do të përfitojë sërish nga fondet europiane. Më 9 mars, Brukseli ka miratuar Programin IPARD III, i cili parashikon financim për fermerët dhe agrobizneset shqiptare. Ministri i Bujqësisë, Andis Salla, dhe Drejtoresha e Përgjithshme e Bujqësisë në Bruksel, Elisabet Werner, kanë bashkëpunuar për të hartuar planet e shpërndarjes të 146 milionë eurove të këtij programi.
Një fokus i veçantë këtë herë do të jetë modernizimi i fermave përmes teknologjive që rrisin sigurinë ushqimore dhe ulin kostot e prodhimit. Programi IPARD III do të strukturohet në nëntë masa, duke përfshirë investime në fermat bujqësore, agropërpunimin dhe marketingun e produkteve, diversifikimin e ekonomisë rurale, asistencën teknike dhe ngritjen e kapaciteteve institucionale, masat agro-mjedisore dhe klimaterike, aksesin LEADER, investimet në infrastrukturën rurale, shërbime këshillimore për fermerë, si dhe menaxhimin dhe zhvillimin e pyjeve.
Këto sektorë janë të rëndësishëm për të rritur vlerën e produkteve shqiptare në tregjet europiane. Siguria ushqimore mbetet një sfidë kritike, me investimet e parashikuara prej 112 milionë eurosh nga Bashkimi Europian dhe 34 milionë euro nga buxheti shqiptar që synojnë të nxisin prodhimin e produkteve të shëndetshme.
Marrja e këtyre fondeve dhe investimeve është një hap i rëndësishëm për Shqipërinë në përpjekjen e saj për t’u integruar më tutje me Bashkimin Europian, duke ndihmuar në përmirësimin e sektorit bujqësor dhe në rritjen e konkurencës në nivel europian.
