Australia ka dhënë azil për pesë anëtare të kombëtares iraniane të femrave, të cilat ndodheshin në vend për të marrë pjesë në AFC Women’s Asian Cup 2026. Sipas mediave ndërkombëtare, futbollistet u larguan nga hoteli i tyre në Gold Coast dhe u dërguan në një vend të sigurt nga policia federale australiane. Aty, ato u takuan me ministrin e Brendshëm, Tony Burke, për të finalizuar procesin për vizat humanitare.
Kombëtarja iraniane kishte mbërritur në Australi muajin e kaluar, para shpërthimit të luftës në Iran. Pas eliminimit nga turneu, lojtaret përballeshin me mundësinë e kthimit në një vend të përfshirë nga tensionet e luftës. Situata tërhoqi vëmendjen ndërkombëtare, veçanërisht pas reagimit të presidentit amerikan Donald Trump, i cili kritikoi Australi për mundësinë e kthimit të lojtareve në Iran, duke e cilësuar si një “gabim humanitar”. Ai ofroi mbështetje për t’i pranuar ato në Shtetet e Bashkuara nëse Australia nuk e bënte këtë.
Trajnerja e Iranit, Marziyeh Jafari, kishte shprehur shqetësimin për disa lojtare që dëshironin të ktheheshin në vendin e tyre, ndërsa të tjera ishin të shqetësuara për sigurinë e familjarëve të tyre. Gjatë turneut, lojtaret irane ishin të kujdesshme në komentet për situatën politike në vend. Një moment simbolik ndodhi përpara ndeshjes së parë kundër Koresë së Jugut, kur skuadra qëndroi në heshtje gjatë himnit kombëtar, një veprim i interpretuar si protestë nga disa, ndërsa të tjerë e panë si një gjest gëzimi për situatën në Iran.
Kjo situatë ka nxitur debate të mëdha në lidhje me mbrojtjen e të drejtave të grave dhe ndihmës humanitare në kohë lufte, duke e bërë këtë rast një temë të rëndësishme në agjendën ndërkombëtare.
