Bashkimi Evropian deklaron se ka rezerva të mjaftueshme nafte për të përballuar ndonjë krizë energjetike, në kontekstin e tensioneve që vazhdojnë në Lindjen e Mesme. Zëdhënësja e Komisionit Evropian, Anna-Kaisa Itkonen, theksoi se vendet anëtare disponojnë rezerva karburanti për 85 deri në 90 ditë. Ajo sqaroi se çdo shtet duhet të njoftojë Komisionin nëse vendos të përdorë këto rezerva strategjike, por deri tani nuk ka asnjë njoftim për lirimin e tyre, përveç disa rasteve të përdorimit nga Hungaria dhe Sllovakia për arsye që nuk lidhen me konfliktet aktuale.
Ndërkohë, ministrat e financave të vendeve të G7 pritet të mbajnë një takim urgjent për të shqyrtuar mundësinë e lirimit të përbashkët të rezervave të naftës, në koordinim me Agjencinë Ndërkombëtare të Energjisë (IEA). Takimi do të zhvillohet në mënyrë virtuale, me pjesëmarrjen e drejtorit të IEA-së, Fatih Birol, për të vlerësuar efektet e krizës me Iranin në tregjet energjetike globale. Disa vende të G7, përfshirë SHBA-në, kanë shprehur mbështetje për një ndërhyrje të tillë, me analistët që sugjerojnë një lirimin prej 300 deri në 400 milionë fuçish për të stabilizuar tregun.
Tensionet gjeopolitike kanë shkaktuar rritje të fortë të çmimeve të naftës, me indeksin Brent që arriti mbi 116 dollarë për fuçi, duke rënë më pas në rreth 110 dollarë për shkak të lajmërimit për takimin e G7. Ndërsa nafta amerikane West Texas Intermediate u rrit gjithashtu, duke arritur mbi 116 dollarë për fuçi.
Krijimi i rezervave strategjike të naftës u bë në vitin 1974 si pasojë e krizës së naftës, dhe ato kanë për qëllim ndihmën për vendet me konsum të lartë në rast goditjesh në furnizim. Aktualisht, vendet anëtare të IEA-së mbajnë mbi 1.24 miliardë fuçi rezerva publike dhe rreth 600 milionë fuçi të tjera në rezervat industriale. Kjo sasi është e mjaftueshme të mbulojë kërkesën totale për naftë për pothuajse një muaj dhe mbi 140 ditë importe neto.
Rritja e çmimeve të energjisë rrit presionin mbi administratën e presidentit amerikan Donald Trump, i cili ka premtuar uljen e inflacionit. Ekonomistët kanë paralajmëruar se përshkallëzimi i konfliktit në Gjirin Persik mund të sjellë pasoja të rënda për ekonominë globale dhe të rrisë rrezikun e inflacionit.
