Kryeministri Edi Rama inspektoi sot rrugën provizore në aksin Librazhd-Prrenjas, e cila tani është stabilizuar. Gjatë këtij inspektimi, ai shpjegoi se prishja e këtij aksit ndodhi për shkak se rruga ishte e vjetër dhe se rrëshqitja lidhej me fenomene natyrore. Rama theksoi se pretendimet për prishje për shkak të korrupsionit janë të pabazuara.
“U përfol se gjoja rruga u shemb nga korrupsioni, por është shumë e qartë se segmenti ishte i vjetër dhe rrëshqitja lidhej me një fenomen tërësisht natyror. Jetojmë në një kohë kur, siç thotë fjala e popullit, gënjeshtra e bën xhiron e botës sa e vërteta ende nuk ka veshur pantallonat. Kjo është një eksperiencë e përditshme,” u shpreh kryeministri.
Ai shtoi se e vërteta gjithmonë del në sipërfaqe dhe se është e nevojshme durim dhe këmbëngulje për ta arritur atë. Rama pranoi që ky zhvillim ka prishur ritmin e jetës për shumë banorë të zonës, por theksoi se qëllimi i vizitës është të ofrojë transparencë mbi afatet e reja të projektit.
Kryeministri përfundoi duke siguruar banorët se qeveria i ka vendosur vetes afate të reja për përfundimin e punimeve, duke u angazhuar për një zgjidhje sa më të shpejtë dhe efikase për këtë situatë.
