Një zyrtar iranian ka dërguar një paralajmërim të qartë ndaj Europës, duke theksuar se çdo vend që do të angazhohet në luftime përkrah SHBA-së dhe Izraelit do të konsiderohet si një “objektiv legjitim”.
Në një intervistë për France24, zëvendësministri i Jashtëm i Iranit, Majid Takht-Ravanchi, theksoi se çdo vend që “bashkon forcat” me këto dy shtete do të përballet me hakmarrjen e Iranit. Ai e ndërlidhi këtë paralajmërim me situatën aktuale dhe theksoi se negociatat me SHBA-në po zhvilloheshin me mirëbesim.
Takht-Ravanchi tha se raundi i fundit i bisedimeve në Gjenevë, i zhvilluar një javë më parë, ishte i suksesshëm, megjithatë, ai akuzoi qeverinë amerikane se, në bashkëpunim me regjimin izraelit, kishte ndjekur një agjendë të dëmshme kundër Iranit, duke e sulmuar vendin.
Ky qëndrim i zyrtarit iranian nënvizon tensionet në rritje midis Iranit dhe shteteve perëndimore, duke ringjallur shqetësime për një përshkallëzim të mundshëm të konflikteve në rajon.
Iranit i është bërë thirrje të ruajë qetësinë në përballjen me këto presione, por siç duket, autoritetet iraniane janë të gatshme të përgjigjen ashpër nëse ndihen të kërcënuara.
