Qindra luftëtarë kurdë kanë nisur një ofensivë tokësore në Iran, sipas Jerusalem Post, e cila raporton për aktivizimin e milicive kurde në zonat pranë kufirit me Irakun. Forcat kurde, që operojnë përgjatë kësaj vije kufitare, janë ndër grupet më të rëndësishme të opozitës që përballen me regjimin në Teheran. Sipas burimeve kurde, këto grupe janë përgatitur për operacione në perëndim të Iranit, me qëllim që të ushtrojnë presion mbi forcat e sigurisë iraniane.
Megjithatë, Aziz Ahmad, Zëvendës Shefi i Shtabit të Kryeministrit të Kurdistanit, e quajti këtë pretendim “qartësisht të rremë”, duke insistuar se asnjë kurd irakian nuk kishte kaluar kufirin. Ndërkohë, presidenti amerikan Donald Trump zhvilloi një bisedë me liderët e grupeve paraushtarake kurde të Irakut për të diskutuar situatën në Iran. CNN raportoi se CIA po shqyrtonte mundësinë e armatosjes së forcave kurde për të nxitur një kryengritje popullore, duke theksuar përvojën e tyre luftarake kundër Shtetit Islamik dhe historinë e pakënaqësive ndaj regjimit iranian.
Kurdët janë marginalizuar dhe shtypur historikisht, duke u rebeluar herë pas here gjatë regjimit të shahut Mohammad Reza Pahlavi dhe pas revolucionit islamik të vitit 1979. Forcat iraniane reaguan me dhunë ndaj rebelimeve, duke shkatërruar qytete dhe fshatra kurde dhe duke lënë mijëra të vrarë. Në lidhje me bisedën e Trumpit, zëdhënësja e Shtëpisë së Bardhë, Karoline Leavitt, tha se diskutimet ishin mbi bazën amerikane në veri të Iraqut, duke mohuar ndonjë plan konkret për mbështetje ushtarake.
Deri tani, rajoni kurd ka përjetuar një seri sulmesh me dronë dhe raketa nga Irani dhe milicitë irakiane, që kanë shënjestruar baza ushtarake amerikane dhe konsullatën amerikane në Irbil. Grupi i kurdëve konsiderohet si fraksioni më i organizuar i opozitës iraniane dhe ka mijëra luftëtarë me përvojë. Pjesëmarrja e tyre në këtë luftë mund të krijojë sfida të konsiderueshme për autoritetet në Teheran, por gjithashtu rrezikon të tërheqë edhe më shumë Irakun në konflikt.
