Shërbimet e Forcës së Posaçme “Shqiponja” në DVP Vlorë, së bashku me specialistët e Seksionit për Hetimin e Krimeve në Komisariatin e Policisë Vlorë, kanë realizuar një operacion për kapjen e personave që qarkullojnë me armë zjarri. Në këtë kuadër, ata ndaluan një automjet tip “Benz” në rrethrrotullimin e bypass-it, në fshatin Babicë e Madhe.
Automjeti drejtohej nga shtetasi F.H., 25 vjeç, dhe kishte si pasagjer shtetasin D.A., po 25 vjeç, të dy banues në Vlorë. Gjatë kontrollit fizik të F.H., në çantën e tij marsup u gjet dhe u sekuestrua një armë zjarri (pistoletë) me një krëhër për 5 fishekë.
Pas kësaj, policia vazhdoi hetimet në banesën e tij, ku u gjetën dhe u sekuestruan 20 fishekë luftarakë, një sasi lënde narkotike e dyshuar cannabis sativa dhe një maskë plastike. Të tjera prova materiale përfshinin 4 aparate celularë dhe automjetin e F.H.
Si rezultat i veprimeve procedurale, F.H. u arrestua për “Prodhimi dhe mbajtja pa leje e armëve luftarake dhe municionit” dhe “Prodhimi dhe shitja e narkotikëve”, ndërsa D.A. u arrestua për “Moskallëzimi i krimit”.
Strukturat e Drejtorisë Vendore të Policisë Vlorë, në bashkëpunim me Prokurorinë e Vlorës, vazhdojnë hetimet për të dy shtetasit, duke shqyrtuar mundësinë e përfshirjes së tyre në ngjarje të tjera kriminale. Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm në Vlorë për veprime të mëtejshme.
