Një studim i kryer nga Shkolla e Mjekësisë, Universiteti Jiao Tong i Shangait dhe i botuar në revistën “Frontiers in Aging,” zbulon rreziqet e kimikateve PFAS, të njohura si “kimikate të përhershme.” Këto substanca, të përdorura në produkte si veshje jo-ngjitëse dhe paketim ushqimi, mund të përshpejtojnë plakjen biologjike, sidomos tek burrat e moshës së mesme.
PFAS janë të pranishme gjerësisht në mjedis dhe ndotja nga këto kimikate është në rritje. Ato lidhen me probleme të rënda shëndetësore, përfshirë kancer, obezitet dhe çrregullime hormonale. Studiuesit analizuan të dhënat nga 326 pjesëmarrës të Anketës Kombëtare të Shëndetit dhe Ushqyerjes (NHANES) 1999-2000 për të matur përqendrimet e 11 kimikateve të PFAS në gjak dhe shënuesit epigjenetik të plakjes.
Rezultatet treguan se dy kimikate, PFNA dhe PFOSA, u gjetën në 95% të pjesëmarrësve. Përqendrim më i lartë i këtyre kimikateve u lidh me plakje më të shpejtë epigjenetike vetëm tek burrat nga 50-64 vjeç, dhe jo tek gratë. Dr. Ya-Qian Xu, autori i parë i studimit, thekson se kjo moshë është një “dritare biologjike e ndjeshme”, e cila e bën trupin më të prirur ndaj stresorëve mjedisorë. Dr. Xiangwei Li gjithashtu sugjeron se faktorë të tjerë të stilit të jetës, si pirja e duhanit, mund të përkeqësojnë efektet e dëmshme të ndotësve.
Autorët e studimit rekomandojnë që rregullatorët të zgjerojnë kufizimet për PFAS-të e reja si PFNA dhe PFOSA, duke kaluar përtej masave të vendosura për kimikatet e vjetra. Ky zbulim vë në dukje nevojën për politika më të rrepta dhe masa për mbrojtjen e shëndetit publik, duke evidentuar rrezikun e vazhdueshëm nga ndotësit mjedisorë.
