Drejtoria e Standardëve Profesionale në Policinë e Shtetit ka pezulluar menjëherë nga detyra inspektorin Aurel Kaziu, i cili ishte agjent i policisë kriminale në Komisariatin e Kamzës. Kjo masë erdhi pas njoftimit nga pala kosovare, e cila raportoi se Kaziu, së bashku me dy individë të tjerë, ishte arrestuar për tentativë të kontrabandimit të 1 milion eurove të papërshkruara nga Serbia në Kosovë.
Rasti u identifikua nga Prokurorinë Speciale të Kosovës, e cila ka ndaluar për 48 orë policin shqiptar dhe dy kosovarët e identifikuar si Etnik Ahmaxhokaj dhe Ardit Laska. Të tre ata po hetohen për veprën penale të “pastrimit të parave”.
Mjeti i dyshuar, një furgon që lidhet me Aurel Kaziun, u kontrollua në kufirin e Kosovës, në pikëkalimin e Merdarës, pas një analize të riskut. Gjatë kontrollit me skaner me rreze X, autoritetet zbuluan një hapësirë të modifikuar në dysheme. Pas kësaj, Policia Kufitare e Kosovës përdori pajisje fibroskopike që çuan në zbulimin e pakove me para, të cilat pas numërimit rezultuan të ishin rreth 1 milion euro.
Autoritetet, përfshirë ato shqiptare dhe kosovare, ende nuk kanë arritur të përcaktojnë origjinën e këtyre parave, si dhe destinacionin përfundimtar. Megjithatë, ekzistojnë dyshime se këto fonde i përkasin një grupi kriminal shqiptar që kishte zgjedhur rrugët tokësore për t’i transportuar ato mes Shqipërisë dhe Kosovës.
