Ish-kryeministri norvegjez dhe ish-kryetar i Komitetit Norvegjez të Çmimit Nobel, Thorbjorn Jagland, ka tentuar të kryejë vetëvrasje dhe ndodhet në spital në gjendje të rëndë shëndetësore. Ky incident ka ndodhur në një kohë kur policia norvegjeze po e heton atë për “korrupsion të rëndë,” në kuadër të akuzave që lidhen me marrëdhëniet e tij me Jeffrey Epstein, i akuzuar për përndjekje dhe shfrytëzim seksual.
Instituti Norvegjez i Nobelit ka kërkuar një shpjegim zyrtar nga Jagland për çdo përfitim financiar që ai mund të ketë marrë nga Epstein gjatë kohës që ai ishte anëtar i Komitetit të Nobelit. Në dosjen “Epstein,” emri i Jagland lidhet edhe me Shqipërinë, ku ai kishte përmendur në email-et e tij se “në Tiranë ka vajza të jashtëzakonshme,” referuar vizitave të tij atje si pjesë e aktiviteteve të Këshillit të Evropës.
Kristian Berg Harpviken, drejtori i Institutit, ka deklaruar se çdo transaksion financiar i rëndësishëm gjatë kësaj periudhe do të konsiderohej shkelje e kodit të etikës. Raportet e publikuara nga Departamenti Amerikan i Drejtësisë sugjerojnë se Jagland i kishte kërkuar Epstein të sigurojë blerjen e një apartamenti, pa u sqaruar ende rezultati i kërkesës.
Dokumentet tregojnë gjithashtu se ai është pritur në rezidencën e Epstein në New York në vitin 2018 dhe në apartamentin e tij në Paris në vitet 2015 e 2018. Ekziston gjithashtu dyshimi se Jagland dhe familja e tij kanë planifikuar një udhëtim në ishullin privat të Epstein në vitin 2014, por ky udhëtim nuk u realizua.
Ministria e Jashtme Norvegjeze ka njoftuar se do t’i kërkojë Këshillit të Evropës të heqë imunitetin e Jagland si ish-sekretari i Përgjithshëm i Organizatës, në mënyrë që ai të mund të japë llogari për akuzat që e rëndojnë. Kjo situatë ka shkaktuar shqetësim të madh në opinionin publik dhe ka ngritur disa pyetje mbi etikën në institucionet e larta të qeverisjes.
