Një operacion ushtarak në Jalisco ka rezultuar në vdekjen e Nemesio Oseguera-s, i njohur si “El Mencho”, udhëheqësi i kartelit Jalisco New Generation Cartel (CJNG). Autoritetet meksikane thanë se 59-vjeçari u plagos rëndë në një shkëmbim zjarri me ushtrinë dhe ndërroi jetë gjatë transportit me helikopter drejt Mexico City.
Ministria e Mbrojtjes së Meksikës njoftoi se gjatë operacionit u vranë shtatë anëtarë të kartelit, tri ushtarë u plagosën dhe dy të tjerë u arrestuan. Forcat e sigurisë sekuestruan armë të rënda, përfshirë raketahedhës. Ky operacion po zhvillohej nën presionin e Shteteve të Bashkuara, që i kishin ofruar informacion mbi vendndodhjen e Oseguera-s dhe kishin vendosur një shpërblim prej 15 milion dollarësh për kapjen e tij.
Pas vdekjes së tij, vala e dhunës shpërtheu në të paktën gjashtë shtete të Meksikës, ku persona të armatosur dogjën automjete dhe bllokuan autostrada, duke shkaktuar kaos në qytete si Guadalajara dhe Puerto Vallarta. Disa kompani ajrore u detyruan të pezullojnë fluturimet drejt zonave të kërcënuara, ndërsa ambasada amerikane u bëri thirrje qytetarëve të gjejnë strehë të sigurt.
Oseguera, i lindur në 1966 në Michoacan, kaloi nga një emigrant dhe ish-oficer policie në një nga figurat më të fuqishme të krimit të organizuar në Meksikë. Ai krijoi CJNG-në pas përçarjeve me kartelin Milenio dhe shpalli luftë ndaj Sinaloa Cartel, miq i Joaquín “El Chapo” Guzmán.
Sipas Departamentit Amerikan të Shtetit, CJNG operon në pothuajse të gjithë Meksikën, duke u përfshirë në trafik droge, zhvatje dhe aktivitete të tjera kriminale. Ekspertët paralajmërojnë se vdekja e Oseguera-s mund të sjellë përplasje të reja për kontrollin e territorit, duke theksuar se nga viti 2006 rreth 450 mijë persona kanë humbur jetën nga dhuna e lidhur me kartelet, ndërsa mbi 100 mijë rezultojnë të zhdukur.
Autoritetet janë në gatishmëri të lartë për të parandaluar destabilizimin e mëtejshëm pas eliminimit të një prej figurave më të rëndësishme të krimit në vend.
