Një anëtar i Forcave Ajrore të SHBA-së, Richard Stefon Ramroop, dhe bashkëshorti i tij, Manuel George Madrid, janë akuzuar për vjedhjen e mbi 3 milionë dollarëve nga qeveria amerikane. Çifti përballet me 12 akuza penale, pasi dyshohet se ka përvetësuar këto fonde nga janari 2022 deri në dhjetor 2025.
Ramroop, i cili punonte si farmacist në Bazën Ajrore Davis-Monthan, dyshohet se ka porositur mijëra pajisje mjekësore duke përdorur paratë e taksapaguesve. Sipas prokurorisë, ata pastaj i kanë rishitur këto pajisje dhe kanë mbajtur fitimet për vete, duke shkaktuar një dëm prej më shumë se 3 milionë dollarësh për Departamentin e Mbrojtjes.
Prokurori i Përgjithshëm i Arizonës, Timothy Courchaine, shpjegoi se llogaritë bankare të dyshuarve kanë patur mbi 11 milionë dollarë nëpërmjet transfertave bankare dhe pagesave nga kompani të pajisjeve mjekësore. Hetimet zbuluan se paratë janë shpenzuar për blerjen e një shtëpie luksoze prej 1 milion dollarësh në Malet Tucson, si dhe për një sërë automjetesh luksoze. Mes automjeteve të blera janë një Porsche Cayenne dhe një BMW i7, të dyja me çmime të larta.
Më 15 janar, autoritetet konfiskuan automjetet dhe pasuritë e tjera pas një urdhri kontrolli, ndërsa Ramroop u arrestua më 16 janar dhe Madrid më 22 janar. Akuzat përfshijnë komplot për vjedhje të pronës qeveritare, mashtrim me fonde elektronike dhe pastrim parash. Rasti ka nxitur shqetësime mbi keqpërdorimin e fondeve të taksapaguesve dhe ka sjellë në vëmendje nevojën për më shumë transparencë në menaxhimin e burimeve financiare të qeverisë.
