Komisioni Europian ka kërkuar qartësi të plotë mbi masat që do të ndërmarrë Shtetet e Bashkuara pas vendimit të fundit të Gjykatës Supreme, e cila anuluar tarifat e vendosura nga Presidenti Donald Trump, duke argumentuar se ai kishte tejkaluar kompetencat e tij pa miratimin e Kongresit.
Në një deklaratë, Komisioni thekson se situata aktuale nuk është e favorshme për arritjen e marrëveshjeve tregtare dhe investimeve midis BE-së dhe SHBA-së, që ishin rënë dakord si “të drejta, të balancuara dhe reciprokisht të dobishme” në Deklaratën e Përbashkët të gushtit 2025. Komisioni nënvizon se do të mbrojë interesat e Bashkimit Evropian dhe se kompanitë dhe eksportuesit e BE-së duhet të kenë trajtim të drejtë dhe siguri ligjore.
Në reagim theksohet se BE-ja, si partneri më i madh tregtar i SHBA-së, pret që Shtetet e Bashkuara të respektojnë angazhimet e marra, ashtu siç BE-ja do të vazhdojë të respektojë angazhimet e veta. Komisioni gjithashtu ka bërë të ditur se është në kontakt të vazhdueshëm me administratën amerikane për të diskutuar për situatën.
Më 21 shkurt, Komisioneri Evropian për Tregtinë, Maroš Šefčovič, u takua me Përfaqësuesin e Tregtisë të SHBA-së dhe Sekretarin e Tregtisë për të diskutuar çështjen e tarifave doganore. Në përfundim, Komisioni shprehu angazhimin për të vazhduar punën e uljes së tarifave në përputhje me marrëveshjet ekzistuese.
Kjo situatë vazhdon të krijojë paqartësi për tregtinë ndërkombëtare dhe për çdo përparim në marrëveshjet mes dy palëve, duke theksuar nevojën për komunikim dhe transparencë në masat që do të ndërmerren nga Shtetet e Bashkuara.
