Mëngjesin e 20 shkurtit, një moment historik për Barcelonën dhe botën e arkitekturës u regjistrua me vendosjen e pjesës përfundimtare të kullës qëndrore të Sagrada Familia-s. Pas 144 vjetësh ndërtimi, kryqi katërkëndor prej çeliku dhe qelqi u ngrit në lartësinë prej 17 metrash, duke e përfunduar kështu kullën kushtuar Jezu Krishtit, e cila tani arrin 172.5 metra, duke u bërë ndërtesa më e lartë në Barcelonë dhe kisha më e lartë në botë.
Ceremonia e pompshme u shoqërua me ngritjen e flamujve të Katalonjës dhe të Vatikanit, ndërsa arkitekti kryesor, Jordi Faulí, e përshkroi këtë moment si “plot gëzim” për të gjithë ata që kontribuan në ndërtimin e saj. Faulí është arkitekti i shtatë që merr përsipër projektin që filloi Antoni Gaudí në vitin 1883.
Sagrada Familia, e cila është pjesë integrale e identitetit të Barcelonës, ka funksionuar si një kantier ndërtimi për dekada me radhë, duke bashkuar zejtarë dhe vizitorë që e kanë mbështetur financiarisht ndërtimin e monumentit. Në 15 vitet e fundit, ndërtimi i brendshëm është përfunduar, duke e bërë kishën plotësisht funksionale, me elemente gjeometrike krijuar nga Gaudí dhe dritare me xham shumëngjyrësh që ofrojnë një ndriçim të veçantë.
Megjithatë, ndërtimi i përgjithshëm nuk ka përfunduar. Tani, vëmendja është përqendruar në fasadën jugore të njohur si “Fasada e Lavdisë”, e cila pritet të kërkojë rreth një dekadë tjetër për t’u përfunduar. Tre artistë të njohur internacionalisht janë ftuar të kontribuojnë në këtë projekt: piktori Miquel Barcelo, skulptorja Cristina Iglesias dhe skulptori Javier Marin.
Fasada e Lavdisë do të bëjë hyrjen qendrore të kishës dhe do t’i kushtohet Lavdisë së Krishtit, duke simbolizuar udhëtimin e njeriut drejt Zotit. Pritet që ky kapitull i fundit në historinë e gjatë të Sagrada Familia-s të përfundojë brenda dekadës së ardhshme.
Sagrada Familia është ata atraksioni më i njohur turistik në Barcelonë, duke tërhequr rreth 5 milionë vizitorë çdo vit dhe duke gjeneruar të ardhura për ndërtimin të cilat arrijnë deri në 150 milion euro. Përfundimi i kullës qendrore shënon një moment thelbësor në një projekt që ka lënë gjurmë në qytetin dhe në jetën e vizitorëve për më shumë se një shekull.
