Zëvendëskryeministri dhe Ministri i Jashtëm i Italisë, Antonio Tajani, shprehu mbështetje të fortë për integrimin europian të Shqipërisë gjatë ministerialit të Korridorit VIII në Tiranë. Ai theksoi se Shqipëria është një vend europian dhe se Italia do të kontribuojë maksimalisht në procesin e anëtarësimit të saj në Bashkimin Europian.
Tajani e vlerësoi Korridorin VIII jo vetëm si një projekt infrastrukturor, por si një zgjedhje politike që është pjesë e strategjisë italiane për të afruar Ballkanin Perëndimor me BE-në. Sipas tij, ky korridor, dhe vetë integrimi i rajonit në BE, janë prioritet kryesor për qeverinë italiane. Ai përmendi se në 30 mars do të organizohet një grup i miqve të Ballkanit për të theksuar mbështetje dhe për bashkimin e rajonit.
Deklarata e përbashkët që do të miratohet do të dërgojë një mesazh të fortë, duke e renditur Korridorin VIII si një prioritet strategjik për ekonomitë e të dy vendeve. Tajani theksoi rëndësinë e tregtisë, e cila për Italinë përbën rreth 40% të PBB-së, duke shprehur qëllimin për të rritur eksportet dhe për të shfrytëzuar potencialin ekonomik mes Adriatikut dhe Ballkanit.
Ai gjithashtu e theksoi përfundimin e Korridorit VII si një objektiv kyç për sigurinë dhe si mjet për të forcuar shtyllën europiane të NATO-s. “Nëse duam të jemi më të rëndësishëm dhe të flasim me amerikanët në të njëjtin nivel, duhet të forcojmë këtë shtyllë”, përfundoi ai.
Me këtë, Tajani nënvizoi se investimet dhe angazhimet për lidhje më të mira infrastrukturore do të kontribuojnë në stabilitetin dhe prosperitetin e rajonit, duke theksuar se këto janë hapa të rëndësishëm në procesin e integrimit të Shqipërisë dhe të Ballkanit në BE.
