Procesi gjyqësor ndaj ish-krerëve të UÇK-së në Dhomat e Specializuara të Kosovës vazhdon këtë të mërkurë me një seancë të rëndësishme, ku do të paraqiten deklaratat përmbyllëse. Në këtë seancë, do të flasin përfaqësuesi i viktimave, mbrojtja e të akuzuarve si dhe vetë të akuzuarit: Hashim Thaçi, Kadri Veseli, Rexhep Selimi dhe Jakup Krasniqi.
Pas një pauze për drekë, çdo të akuzuar do të ketë mundësinë të drejtohet trupit gjykues me një fjalim prej 20 minutash. Sipas raportimeve nga mediat kosovare, pritet që në këtë seancë të jetë i pranishëm edhe zëvendëskryeministri i parë, Glauk Konjufca.
Në seancën e fundit, pas deklaratave përmbyllëse të mbrojtjes së Jakup Krasniqit, trupi gjykues dhe prokuroria bënë pyetje shtesë ndaj palëve. Pas përmbylljes së deklaratave, çështja do të kalojë për vendimmarrje. Gjykatësit kanë një afat deri në tre muaj për të shpallur vendimin, me mundësinë për të kërkuar një shtyrje të këtij afati.
Prokuroria Speciale ka kërkuar dënimin e katër ish-krerëve me nga 45 vite burg për secilin, duke theksuar rëndësinë e këtij procesi për drejtësinë në vend. Kjo seancë shënon një moment kyç në historinë gjyqësore të Kosovës, pas një periudhe të gjatë hetimesh dhe zhvillimesh ligjore. Ajo reflekton një përpjekje për të sjellë para drejtësisë ata që akuzohen për krime gjatë periudhës së luftës.
