Një nismë e depozituar së fundmi në Kuvend nga deputetja socialiste e qarkut të Vlorës, Zamira Sinaj, synon që të favorizojë investitorët strategjikë. Sipas nismës që mban fimën e deputetes Sinaj, investitorët strategjikë do të kenë lehtësira për të krijuar porte turistike në zonat ku edhe janë ndërtuar fshatrat turistikë, ku sërish kanë pasur lehtësira ligjore.
Kjo nuk është më thjesht një nismë ligjore. Kjo është një deklaratë e hapur se shteti është kthyer në agjenci shërbimi për oligarkët.
Kur në Kuvendi i Shqipërisë depozitohen ligje që u japin investitorëve “strategjikë” porte pa garë, pa transparencë, pa konkurrencë, atëherë kemi të bëjmë me kapje të pastër të shtetit. Portet janë pasuri kombëtare, janë derë hyrëse e ekonomisë, janë siguri kombëtare – nuk janë trofe që ndahen në tryeza pazari.
Qeveria flet për zhvillim, por vepron për përqendrim pasurie në duart e pak njerëzve. Flet për turizëm elitar, por në fakt ndërton monopol elitar. Çdo ligj i qepur me porosi për “investitorë strategjikë” është një tullë më shumë në murin e oligarkisë.
Dhe po, pyetja është legjitime: ku është opozita?
Nëse opozita hesht përballë privatizimit të aseteve strategjike pa garë, atëherë ose është e pafuqishme, ose është pjesë e lojës. Në të dy rastet, humbësi është qytetari shqiptar.
Kur portet, bregdeti, energjia, toka publike kalojnë nga dora e shtetit në duart e një grushti biznesmenësh të lidhur me pushtetin, kjo nuk quhet reformë. Kjo quhet ndarje pazari. Dhe kur pazari bëhet me pasuritë e kombit, atëherë kemi të bëjmë me një sistem që nuk qeveris për qytetarët, por për ortakët.
Qytetarët duhet ta kuptojnë: sot janë portet, nesër do të jetë çdo aset tjetër strategjik. Nëse nuk ka reagim, nuk ka transparencë dhe nuk ka presion publik, modeli i “shtetit-aksioner për oligarkët” do të bëhet normë.
Nuk është çështje majtas apo djathtas. Është çështje nëse Shqipëria do të qeveriset nga ligji dhe gara e ndershme, apo nga telefonatat dhe pazaret e mbyllur.
Lexo dokumentat👇
