Sot në Vlorë është mbajtur një protestë nga shoqata e shërbimeve të transportit urban, ndërqytetas dhe ndërkombëtar. Rreth 100 përfaqësues të këtij sektori u mblodhën për të kërkuar nga Bashkia rishikimin e vendimit për zhvendosjen e stacionit interurban.
Vendimi, i votuar në Këshillin Bashkiak, parashikon që stacioni të transferohet nga rruga e re në hyrje të qytetit në një aks nga IEVP Vlorë (paraburgimi) drejt ish-shkollës së Aviacionit. Ky ndryshim është kundërshtuar nga drejtuesit e mjeteve dhe përfaqësuesit e kompanive të transportit, të cilët e shohin si të papranueshëm.
Sipas tyre, lokacioni i ri nuk ofron kushte minimale për shërbim. Mungojnë ambiente për shërbimin e pasagjerëve, strehë pritjeje, tualete publike dhe hapësira e trotuarit është e ngushtë për qëndrimin e pasagjerëve. Ata gjithashtu theksojnë se ka mungesë sinjalistike dhe rrezik për aksidente, ndërsa distanca e re nga qëndra e qytetit është një tjetër shqetësim.
Ky reagim është pjesë e një sere protestash nga kompanitë e transportit, të cilat paralajmërojnë se do të intensifikojnë veprimet e tyre nëse nuk ka një përgjigje nga Bashkia. Protestuesit janë të vendosur në qëllimin e tyre për të siguruar kushte më të mira për transportin e pasagjerëve dhe për t’u siguruar që vendimi i Bashkisë të rishikohet.
