Tankeri me flamur panamez, Veronica III, u sekuestrua nga forcat amerikane të Departamentit të Luftës, dyshohet për lidhje me Iranin dhe Rusinë dhe përpjekje për t’u shmangur sanksioneve të vendosura nga presidenti Donald Trump. Operacioni u krye në orët e para të së dielës në zonën e përgjegjësisë së INDOPACOM, pa asnjë incident.
Sipas një deklarate nga Departamenti i Luftës, forcat amerikane e gjurmuan anijen që nga Karaibet deri në Oqeanin Indian, duke realizuar inspektimin dhe sekuestrimin e saj. Departamenti theksoi se “asnjë komb tjetër nuk ka shtrirjen, durimin ose vullnetin për ta bërë këtë” dhe u shpreh se “ujërat ndërkombëtare nuk janë strehë”.
Në deklaratë u përmend se SHBA do të vazhdojë të ndjekë aktorët e paligjshëm dhe të mohojë lirinë e lëvizjes për ta në hapësirën detare, që është e domosdoshme për ruajtjen e sigurisë ndërkombëtare.
