Dy shtetas shqiptarë janë arrestuar nga policia italiane, pasi dyshohet se bënin pjesë në një rrjet shpërndarjeje të kokainës. Operacioni u realizua pas disa ditësh monitorimi të lëvizjeve të dy të rinjve, të cilët u ndoqën deri në një zonë periferike të qytetit, ku u panë duke marrë një sasi të dyshuar lëndë narkotike. Ky veprim çoi në ndërhyrjen e policisë.
Gjatë kontrollit në automjetin e tyre, autoritetet zbuluan rreth 50 doza kokaine të gatshme për shpërndarje. Kontrolli vazhdoi edhe në banesën e të arrestuarve, ku u sekuestruan sasi të tjera droge, pajisje për peshimin dhe paketimin e saj, si dhe 4 mijë euro, të dyshuara si të përfituara nga aktiviteti i paligjshëm. Në total, policia raportoi sekuestrimin e rreth 200 gramë kokainë, me një vlerë tregu mbi 10 mijë euro.
Me urdhër të Prokurorisë Publike në Ankona, dy të rinjtë u arrestuan në flagrancë dhe janë dërguar në burgun e Montacuto, ku do të qëndrojnë për llogari të drejtësisë italiane. Kjo operacion nënvizon përpjekjet e autoriteteve italiane për të luftuar krimin e organizuar dhe trafikun e drogës.
