Një kompani e lidhur më herët me vëllezërit Belind dhe Reshard Këlliçi ka fituar një tender me vlerë mbi 800 mijë euro nga Porti i Durrësit. Bëhet fjalë për kompaninë e ngarkim/shkarkim të mjeteve lundruese dhe energjisë ALBANIAN STEVEDORING COMPANY (ASC) shpk., aktualisht në pronësi 100 % të shtetasit Lorin Hoxha nga Durrësi.
Në janar të vitit 2019, vëllai i Belind Këlliçit ka blerë 5 % të aksioneve të kompanisë SIAC me nipt J61819503G. Asokohe, kompania SIAC kishte 80 % të aksioneve në kompaninë ALBANIAN STEVEDORING COMPANY (ASC) shpk. Përmes SIAC, Reshard Këlliçi përfitonte nga veprimtaria e kompanisë ASC, e cila rezulton e lidhur ngushtë me Portin e Durrësit.
Në shkurt të vitit 2021, Reshard Këlliçi ia ka dhuruar aksionet në kompaninë ALBANIAN STEVEDORING COMPANY (ASC) shtetasit Lorin Hoxha. Ky i fundit është vëllai i Luis Hoxhës, i lakuar në media si bos call centerash. Luis Hoxha, pronar i një karteli kompanish të dyshimta rezulton lidhje e ngushtë shoqërore dhe politike e Belind Këlliçit, i cili po hetohet nga SPAK për mosdeklarim pasurie.
(Me rreth të kuq Luis Hoxha dhe Belind Këlliçi)
Në korrik të vitit 2025, kompania ALBANIAN STEVEDORING COMPANY (ASC) ka fituar pa konkurrencë tenderin me vlerë mbi 800 mijë euro nga Porti i Durrësit me objekt; ‘Marrje me qera reachsteaker dhe kamiona për Terminalin e Konteinereve’, në bashkëpunim me shtetasin Rrahim Çela.
Ndërkaq, në vitim 2021, Reshard Këlliçi rezulton i punësuar si këshilltar ligjor në shoqërinë Albgaz, në pronësi të ministrisë së drejtuar nga zonja Belinda Balluku. Në varësi të ministres së Infrastrukturës është edhe Porti i Durrësit, me veprimtarinë e të cilit ka lidhje të ngushta kompania ASC, tek e cila ka qenë aksioner vëllai i Belind Këlliçit.
Në varësi të zonjës Balluku është edhe Instituti i Ndërtimit, i cili deri disa muaj më parë drejtohej nga Artan Shkreli, vjehrri i Belind Këlliçit. Ndërkaq, bashkëshorta e Belind Këlliçit, Anna Shkreli, rezulton se ka përfituar para publike nga disa ente shtetërore, si person fizik, konkretisht nga Qendra Kombëtare e Librit dhe Leximit dhe Zyra e Administrimit të Buxhetit Gjyqësor./ Prapaskena/
