Një aksident i rëndë ka ndodhur pasditen e kësaj të mërkure në Tiranë, pranë Kopshtit Zoologjik. Një automjet taksi ka përplasur një motomjet, si pasojë e të cilit drejtuesi i motomjetit ka mbetur i plagosur. Pamjet e siguruara nga Top Channel tregojnë se pas aksidentit, taksia është goditur në murin përreth.
Ky incident ka shkaktuar kaos dhe trafik të rënduar në zonë. Mungesa e hapësirës për kalim ka penguar mbërritjen e ambulancës, duke e bërë të vështirë transportimin e të plagosurit. Në vendngjarje është e pranishme policia e cila po punon për të menaxhuar situatën dhe për të zbardhur shkaqet e aksidentit.
Aksidenti ka sjellë shqetësim në rrethinën e Kopshtit Zoologjik, duke tërhequr vëmendjen e qytetarëve dhe kalimtarëve. Ndërkohë, autoritetet e trafikut janë angazhuar për të rikthyer normalitetin në rrugë.
