SPAK ka dërguar për gjykim ish-Kryetarin e Bashkisë Memaliaj, Gjolek Guci, për “Shkeljen e barazisë së pjesëmarrësve në tendera”. Të akuzuar janë gjithashtu Edmonda Harizi, ish-Nënkryetare e Bashkisë, Feta Hoxha, ish-Drejtor i Shërbimeve Publike, dhe Bersant Ylli, administrator i subjektit të njëjtë.
Hetimet kanë filluar pas një kallëzimi nga Kontrolli i Lartë i Shtetit më 28 tetor 2024, duke regjistruar një procedim penal më 4 nëntor 2024 për shkeljet në tendera. Objekt i hetimit ishte procedura e prokurimit për ndërtimin e Ujësjellësit Rajonal në vitin 2021, me autoritet kontraktor Bashkinë Memaliaj.
Sipas hetimeve, Guci ka nënshkruar një kontratë dhurimi më 21 shtator 2020 me kompaninë “Artreum Generation”. Fondi për projektin ishte mbi 493 milionë lekë, dhe vlera e miratuar përfundimisht ishte identike me atë të propozuar nga “Artreum Generation”, e cila ishte nënkontraktore e kompanive fituese të tenderit.
Dokumentacioni i procedurës ka treguar se anëtarët e Komisionit të Vlerësimit të Ofertave, përfshirë Gucin, Harizin, Hoxhën dhe Yllin, në bashkëpunim, kanë krijuar privilegje të padrejta për disa operatorë, duke shpallur fitues një bashkim operatorësh me mangësi të dukshme në dokumentacion. Po ashtu, nënkontraktimi me “Artreum Generation” është kryer në kushte konflikti interesi, pasi ky subjekt kishte hartuar specifikimet teknike të projektit.
Më 28 janar 2026, është vendosur ndarja e hetimit për të parë më shumë rreth zbatimit të kontratës, duke kërkuar veprime hetimore të mëtejshme në këtë çështje.
