Një protestë është mbajtur nga banorët e fshatit Imshtë të njësisë Bubullimë në Lushnjë, të cilët kundërshtojnë ndërtimin e një parku fotovoltaik në zonë.
Sipas deputetit të PS, Erion Braçe, po ndodh një grabitje e tokës publike për ndërtimin e paneleve diellore.
Por kush do të ndërtojë në këtë zonë dhe cili është deputeti që po mbështet ndërtimin?
Elton Çekrezi, pronar i EuroElektra ka blerë tokën shtetërore dhe do të ndërtojë aty panele fotovoltaike.
Çekrezi ka krijuar kompaninë “SunXpower” me të cilën ka fituar leje për të ndërtuar panele fotovoltaik në Imshtë të Lushnjës.
Zanafilla e konfliktit ka nisur që prej vitit 2024, ku banorët sërish protestuan duke kundërshtuar ndërtimin, pasi sipas tyre, zona është pronë shtetërore e patjetërsueshme nga ligji.
Edhe një vit më parë deputeti socialist Erion Braçe, thoshte se është kërcënuar përmes celularit nga një person që i është prezantuar si “Zoti Çekrezi”, që të mos vazhdojë të mbrojë tokën pranë lumit Seman, në fshatin Imshtë.
“Kam marre nje kercenim! Nga njefare zoti Çekrezi-keshtu prezantohet; Eshte nga keta zengjinet e rinj perhapur ne kete vend, plot arrogance e terbim”, shkruan deputeti.
Si e dëshmon dhe Braçe në videon e mëposhtme, Policia e Lushnjës ka thirrur katër banorë të fshatit Imshtë, pasi raportohet se janë kërcënuar dhe ata në të njëjtën mënyrë si deputeti i tyre i zonës.
https://www.facebook.com/plugins/video.php?height=476&href=https%3A%2F%2Fwww.facebook.com%2Ferionbrace.alb%2Fvideos%2F805066618482746%2F&show_text=false&width=267&t=0
Nga ana tjetër familja Çekrezi, pretendojnë se kanë blerë tokën shtetërore.
Për të sqaruar banorët, familja Çekrezi asakohe reagoi me dokumenta, ku sipas tyre: “sipërfaqja e tokës për të cilën pretendohet nuk është pronë e shtetit dhe nuk është marrë nga shteti”.
Familja Çekrezi deklaroi se toka është blerë me kontratë noteriale nga një familje ish-pronarësh, të cilët e kanë fituar pronësinë e saj me vendim të kthimit dhe kompensimit të vitit 1998.
Për këtë, në cilësinë e pronarëve të rinj, disponojnë dokumentacion pronësor të azhornuar nga Kadastra si edhe të gjithë dokumentacionin e origjinës (që nga vendimi i sekuestros nr.5 datë 23.07.1945 deri te vendimi i kthimit nr.58 datë 03.11.1998), shkruan zëri.
Sa i përket kundërshtimit të banorëve, biznesmeni shprehej se i kanë zaptuar të gjithë sipërfaqen, përfshirë tokën shtetërore dhe atë private, për të cilat nuk kanë asnjë dokumentacion.
Në videon e mëposhtme është Anduelivëllai i biznesmenit Elton Çekrezi duke debatuar me banorët:
Ditën e djeshme, deputeti Erion Braçe në postimin e tij kujton se një tentativë e ngjashme për përvetësimin e kësaj toke ka ndodhur edhe më herët, me mbështetje politike, nga një politikan, për të cilin nuk jep një emër.
Deputeti shprehet se ndërtimi është ndalur pasi çështja ka kaluar për hetim, ku shprehet se një “agai i ri”, identieti i të cilit nuk dihet, po synon të ndërtojë panele fotovoltaike në këtë zonë.
Braçe nënvizon se çështja është në fazën e dytë të veprimeve hetimore nga Prokuroria e Fierit.
“Ky që shihni në video, që ju bërtet bujqve e ju thotë “boll bërtitet” është agai i ri që do të ndërtojë panele fotovoltaike mu në këtë tokë! Ç’ është kjo tokë? Është një sipërfaqe toke nga buza e lumit Seman deri në argjinaturë. Është kjo mbi të cilën po rrijnë bujqit. Dy javë të shkuara, ky tip ishte në Imshtë pa policinë, por me kriminelë që bënin çmos tu dukeshin armët; kanë kërcënuar banorët dhe ju kanë përmendur jetën e fëmijëve. A ka turp më të madh se Policia e Shtetit sot në mbrojtje të një grabitjeje ditën për diell kur ligji është shumë i qartë?! Është e përsëritur kjo! Një vit e gjysmë më parë, me mbështetje të një politikani, i njëjti tip kishte përsëri policinë me vete deri ditën që politikani ra nga karrigia’, denoncon deputeti.
Teksa në 2024 konflikti u ndërpre dhe nuk pati një ndërtim të paneleve, mbetet për tu parë se çfarë do të ndodhë në ditët në vijim dhe a do dalë në publik politikani që fshihet pas paneleve fotovoltaikë./ VoxNews/
